Тараз қаласындағы Б.Момышұлы атындағы «Жеңіс» саябағында Жамбыл аудандық орталықтандырылған кітапханалар жүйесінің ұйымдастыруымен Ұлы Жеңістің 80 жылдығына арналған «Батырлар рухына тағзым» атты тарихи композиция өтті, деп хабарлайды Jambylinfo.kz

Іс-шараның негізгі мақсаты – сұрапыл соғыс жылдарындағы қазақ халқының майдан мен тылдағы ерен еңбегін жас ұрпаққа үлгі етіп, отансүйгіштікке, елжандылыққа, рухани құндылықтарды құрметтеуге тәрбиелеу. Сонымен қатар, ата-бабаларымыздың ерлігін ұмытпай, бүгінгі бейбіт күннің қадірін ұғындыру.

Кеш барысында «Қаһарлы жылдар шежіресі», «Ерлер есімі – ел есінде», «Майдан жыры мен сыры», «Қазақтың батыр ұлы – Бауыржан Момышұлы», «Желбіре Жеңіс жалауы» атты көрме-инсталляциялар көпшілік назарына ұсынылды. Бұдан бөлек, Жамбыл ауданынан шыққан соғыс және еңбек ардагерлеріне арналған арнайы фото-галерея жасақталып, олардың өмір жолы мен ерлік істері көпшілікке таныстырылды.

Салтанатты кешке Жамбыл ауданы мен облыс көлемінен келген бірқатар құрметті қонақтар қатысты. Атап айтқанда:

Сұлтанбаев Нұрасыл – «Шұғыла-Радуга» газетінің бас редакторы;

Досымбекова Мақпал Сатыбалдықызы – Жамбыл ауданы әкімінің орынбасары;

Маханбетқұлов Сансызбай Бертайұлы – Қазақстан Журналистер одағының мүшесі;

Сырлыбаев Бақыт Уәлиұлы – Жамбыл ауданы ардагерлер ұйымының төрағасы;

Оспанова Жансая Жолтайқызы – Жамбыл ауданы әкімдігінің мәдениет және тілдерді дамыту бөлімінің басшысы;

Сырлыбаев Асқар Бақытұлы – Жамбыл аудандық музейдің директоры.

Кеш ел рухын көтеріп, көпшілікке терең ой салып, өткенді еске алу арқылы болашаққа деген сенімді нығайтты. Жеңістің 80 жылдығы қарсаңында өткен бұл тағылымды іс-шара – тарихты ұлықтаудың, ұлт батырларына құрмет көрсетудің жарқын үлгісі болды.