Алматыдағы Орталық мешіттің наиб-имамы Тимур Әлиевтің айтуынша, құрбандыққа мал шалуға немесе қажылыққа баруға несие алу – шариғатқа қайшы, деп хабарлайды Jambylinfo.kz 

Оның айтуынша, исламда адамды шамасынан тыс нәрсеге мәжбүрлеу жоқ.

"Алла Тағала пендесіне шамасы келген нәрсені ғана жүктейді. Егер адамның жағдайы болмаса, ол үшін сұралмайды – бұл құрбандыққа да, қажылыққа да қатысты", – деді наиб-имам.

Сондай-ақ ол қажылыққа бару – тек физикалық әрі қаржылай мүмкіндігі бар адамға ғана парыз екенін еске салды.

"Қазір кейбір азаматтардың умра не қажылыққа бару үшін қарыз алып жатқанын көріп жүрміз. Бұл – дұрыс емес. Мұндай талап жоқ, әрі ол шариғатқа сәйкес келмейді", – деп түйіндеді ол.