Елімізде жаңа зейнетақы жинақтары есебінен төленетін төлемді анықтайтын қағидалар күшіне енді, деп хабарлайды Jambylinfo.kz
 Inbusiness.kz жазуынша, бұл жаңа төлем – "жұмыс берушінің міндетті зейнетақы жарналары" (ЖМЗЖ) деп аталады және оны жұмыс берушілер өз қызметкерлеріне биылғы 2024 жылдың 1 қаңтарынан аталған қорға аудара бастады. Кейін сол қызметкерлер зейнеткерлікке шыққанда осы жарналардан оған зейнетақысына қоса, өмір бойғы төлем де төленеді.
Жаңа қағидаларға сәйкес, енді әрбір жұмыс беруші БЖЗҚ-ға қызметкердің табысынан ұсталатын міндетті 10%-дық жарналардан бөлек, өз қаражаты есебінен қосымша жарна аударуға міндетті. Яғни, жарналарды төлеу ұйым-компанияның өз қаражатынан жүзеге асырылады, бірақ олардың мөлшері қызметкердің табысына қарай есептеледі. ЖМЖЗ кезең-кезеңмен ұлғайтылады:
•      2024 жылғы 1 қаңтардан бастап – жалақының 1,5%-ы;
•      2025 жылғы 1 қаңтардан бастап – 2,5%;
•      2026 жылғы 1 қаңтардан бастап – 3,5%;
•      2027 жылғы 1 қаңтардан бастап – 4,5%;
•      2028 жылғы 1 қаңтардан бастап – 5%.
Бұл ретте ЖМЗЖ тек 1975 жылдың 1 қаңтарынан кейін туылған жұмыскерлерге ғана аударылады. Мұнда қызметкердің ай сайынғы табысы ең төменгі жалақы мөлшерінен (2024 жылы – 85 мың теңгеден) төмен болмауға тиіс.