Рамазан айы – мұсылман баласы үшін сабыр мен тақуалықты шыңдайтын, рухани тазару кезеңі. Алайда күн ұзақ ауыз бекітіп, ауыр еңбекпен айналысатын жандар үшін ораза ұстау кейде оңайға соқпайды. Әсіресе дене күшін талап ететін жұмыс иелері шөл мен әлсіздікке тап болуы мүмкін. Осындай жағдайда шариғаттың үкімі қандай? Қандай кезде ауыз ашуға рұқсат етіледі, ал қай кезде бұзуға болмайды? Бұл сұрақтарға Қазақстан мұсылмандары діни басқармасының өкілдері жауап берді.
ҚМДБ-ның мәліметінше, аузы берік адам (ауыр жұмыс істеу арқылы) қатты шөл мен аштыққа шалдығып, сол үшін өмірінен не есінен айырылатындай жағдайға душар болса, онда оған оразасын бұзуға рұқсат етіледі. Кейіннен бұл күннің қазасын ғана өтейді. Тек өзін әлсіретуге өзі себепші болып, тіпті ауыз ашуға дейін алып барса, әрі бұған ешқандай зәрулік жағдай түрткі болмаса ғана кәффаратын өтейді.
Сондықтан наубайшы, егінші секілді ауыр жұмыс істейтіндер оразасын аяғына дейін ұстауға кедергі келтіретіндей тым көп жұмыс істемеу керек. Рамазан күндерінде күздізгі жұмысын қысқартуы немесе түнгі уақытқа ауыстыруы қажет.
Дегенмен рамазан айларында ауыр жұмыс істеуге мәжбүр болған адамдар таң атқаннан аузын аша бермейді. Сәресін ішіп, аузын бекітеді. Мүмкін Алла оған оразасын соңына дейін тұтуға көмек берер.
«әл-Фәтәуә әл-Һиндия» атты кітапта: «Өзінің жұмысын істеу арқылы ауыз ашуға рұқсат ететін зиянның жетуін біліп, алайда ауырмай, не қиналмай жатып оразасын бұзуы – харам»[2] делінген.
Сондықтан ауыр жұмыс істейтін адам себепсіз ораза ұстамай қалмауына болмайды. Ондай адам Рамазан айының мол сауабынан құр қалып қоймауы үшін еңбек демалысын осы айға сәйкестендіріп, мүмкіндігінше жұмыс уақытын қысқартып немесе одан жеңілдеу жұмысқа ауысқаны абзал.
Ұқсас жаңалықтар
