Астанада Перизат Қайратқа қатысты іс бойынша алдын ала тыңдау басталды, деп хабарлайды Jambylinfo.kz 

Айыпталушылар қатарында оның анасы — Гани Алашбаева да бар. Тергеу нұсқасы бойынша, ол қызына қайырымдылық қаражаттарын иемденіп, жаратуына көмектескен. Екі айыпталушы да журналистердің сотқа қатысуына қарсы болып, БАҚ өкілдеріне бейнетүсірілім жүргізуге тыйым салуды сұрады.

Сонымен қатар, сот процесін жабық өткізу туралы өтініш те берілді. Перизат Қайрат бұл істің ішінде банк шоттары секілді жеке мәліметтер көп екенін айтып, ашық қаралуына қарсылық білдірді. Судья кеңесу бөлмесіне шешім қабылдауға кетті.

Бұған дейін апелляциялық сот Перизат Қайрат құрған "Biz Birgemiz Qazaqstan 2030" қоғамдық бірлестігін жабу туралы шешімді өзгеріссіз қалдырған еді.

Перизат Қайрат пен анасы Гани Алашбаева мүмкіндігі шектеулі балаларға, су тасқынынан зардап шеккендерге және Таяу Шығыстағы қақтығыстарға байланысты көмек көрсету сылтауымен Қазақстан азаматтары мен ұйымдарынан жиналған 3,5 миллиард теңгені жымқырды деп айыпталып отыр. Тергеу материалдарына сәйкес, Қайрат қайырымдылыққа түскен қаражаттың басым бөлігін жылжымайтын мүлік пен қымбат заттар сатып алуға жұмсаған. Бұған дейін Қаржылық мониторинг агенттігі бұл іс бойынша нақты деректерді жариялаған болатын.