Жамбылдық айтыскер Әсемай Сейдакбарова  республикалық оқушылар байқауында жеңімпаз атанды, деп хабарлайды Jambylinfo.kz

Астана қаласында ХІ “АҚБЕРЕН” республикалық оқушылар байқауы өтті. Сайысқа еліміздің түкпір-түкпірінен іріктелген жас өнерпаздар келген.

Ауқымды байқауда “Айтыс” бағыты бойынша жерлесіміз Әсемай Сейдакбарова  жүлделі І-орын иеленіп, үмітті ақтады.

Жас айтыскердің ұстазы әрі жетекшісі, белгілі ақын Есет Досалының сөзінше, биыл байқау жоғары деңгейде ұйымдастырылған. Соған сай дайындықтың да осал болмағанын айтты.

• Дайындық жоғары деңгейде болады. Байқаудың өту барысына келер болсақ, Әсемай шәкіртім бірінші айналымда Бекарыс Кәктай деген ақынмен айтысып, жеңісті еншіледі. Ал, финалда астаналық үздік айтыскер Абылай Қайратұлымен болған сөз барымтасында ұтымды ой, салмақты өлең айтып, үздік деп танылды. Бірақ, осы айтыс – айтыстың алды болды. Көрерменнің көңілінен шықты. Осылайша шәкіртім жеңімпаз атанды,- деді Есет Досалы.

Айта кетейік, жас айтыскер Әсемай Сейдакбарова Талас ауданы Қаратау қаласындағы А. Байтұрсынов атындағы мектеп-гимназиясының 11 сынып оқушысы.

Биылдың өзінде бірнеше республикалық айтысқа қатысып, жүлделі орындарды еншіледі. Мәселен, Талдықорған қаласында өткен «Жыр алыбы Жамбылым» атты айтыста Есенқұл Жақыпбеков атындағы арнайы сыйлыққа ие болды.

Бұдан бөлек, Түркістан қаласында өткен республикалық айтыста үшінші орын иеленіп, жерлестерін қуантты.