Павлодар облысының Екібастұз қаласында тұратын жасөспірім nail-индустрияда әлем чемпионы атанды, деп хабарлайды ҚазАқпарат Pavlodarnews.kz сайтына сілтеме жасап. Арулат Мухаметқали Instagram-аккаунтында қуанышты жаңалығымен бөлісті. Тырнақ әрлеу сервисінің 14 жастағы шебері қолдау білдірген ата-анасына, тәлімгеріне және облыс әкімдігіне алғыс айтты. «Сүйінші! Достар, құттықтап қойсаңыздар болады, өз категориямда nail-индустриясының Әлем чемпионы атандым. Қуаныштымын, ұйқысыз түндер бекерге кетпеді... Әрбір чемпионат өзімді шыңдауға және алға ұмтылуға мүмкіндік береді», - деп жазды жасөспірім. Облыс әкімі Әбілқайыр Сқақов nail-стилисті жеңісімен құттықтап, жаңа белестерді бағындыруды, жаңа мақсаттар мен жеңісті күндер тіледі. Еске салайық, Арулат Мухаметқали – «Ертіс дарыны-2021» жастар сыйлығының иегері.