Оқу-ағарту министрлігі оқушылардың көктемгі демалысында өтетін іс-шаралар бойынша әдістемелік ұсынымдар әзірледі, - деп хабарлайды Jambylinfo.kz

"Мектептердің барлық сыныптарына арналған гайдбукте демалыстың әр күні Наурызнама декадасымен байланысты және қоғамның маңызды аспектілеріне арналған: отбасылық құндылықтар, мәдениет, ұлттық дәстүрлер, қайырымдылық, спорт және т.б. Мектептерде бірқатар білім беру, спорттық, мәдени және шығармашылық іс-шаралар жоспарланған. Олар – театр фестивальдері, қойылымдар мен фильмдер көрсетілімі, шеберлік сағаттары, қауіпсіздік сабақтары, мұражайларға, ғылыми орталықтарға және тарихи ескерткіштерге танымдық экскурсиялар, спорттық ойындар, қайырымдылық акциялары", – деп хабарлады министрлік.

Ұсынымдарда балалардың қатысуымен болатын жол-көлік оқиғаларының алдын алу, мектеп ішкі тәртіп ережелерін сақтау, көшедегі қауіпсіздік шаралары, үйдегі өрт қауіпсіздігі және киберқауіпсіздік мәселелеріне ерекше көңіл бөлінген.

Көктемгі демалыс 21-31 наурыз аралығында өтеді. Биыл бес күндік жұмыс режимінде істейтін қазақстандықтар үшін Наурыз мерекесіне байланысты 21-25 наурыз аралығында бес күндік демалыс болады.

Мектептерде төртінші тоқсан 1 сәуірде басталады.