ЦАХАЛ таратқан мәліметке сәйкес, 21 мамыр күні дипломатиялық делегация Дженинге алдын ала келісілген тәртіппен кірген. Сапар алдында делегацияға аймақтағы қауіпсіздік жағдайына байланысты арнайы бағыт ұсынылған, - деп хабарлайды Jambylinfo.kz 

"Бастапқы тергеу нәтижесіне сәйкес, делегация белгіленген бағыттан ауытқып, кіруге тыйым салынған аумаққа өткен. Осы аумақта жүрген Израиль әскері ескерту ретінде оқ атқан. Зиян келген жоқ, зардап шеккендер де жоқ", – делінген ресми хабарламада.

Sky News агенттігінің хабарлауынша, палестиналық билік делегацияның гуманитарлық жағдайды бағалау мақсатында келгенін мәлімдеген. Делегация құрамында аймақтық, еуропалық және батыс елдерінің дипломаттары болған.

Германия, Ирландия және Түркия – делегация құрамында болған елдер – бұл оқиғаны қатаң сынға алды. Ирландия премьер-министрінің орынбасары Саймон Харрис бұл әрекетті "қабылдауға келмейтін оқиға" деп бағалап, қатаң айыптады.

Ал Түркия Сыртқы істер министрлігі: "Дипломаттарға шабуыл жасау – олардың қауіпсіздігіне ғана емес, сонымен қатар мемлекеттер арасындағы өзара сенім мен құрметке қатер төндіреді", – деп мәлімдеді.