Жамбыл облысынан жеке демеушілер тарапынан су тасқыны болған Атырауға гуманитарлық көмек жіберілді, деп хабарлайды  Jambylinfo.kz

Көктемгі табиғи апаттан еліміздің 10 облысында төтенше жағдай жарияланған еді. Қазір бұл аймақтарда бүлінген мүлікті бүтіндеу, қалпына келтіру жұмыстары қарқынды жүргізіліп жатыр. Игілікті іске әр өңір атсалысып жатқаны белгілі. Осы орайда Жамбыл облысы кезекті гуманитарлық көмек тиелген жүк көліктерін Атырауға аттандырды. Жауаптылар алдағы аптада Маңғыстау облысына да осындай жәрдем жөнелтілетінін айтты.

-    Бүгін Жамбыл облысының прокуратурасының бастамасымен, облыс әкімдігінің қолдауымен су тасқынынан зардап шеккен Атырау облысындағы құрылыс жұмыстарын қолдауға гуманитарлық көмек жібердік. Өздеріңіз білетіндей, көктемгі екпіні қатты қарғын су ауылдарға кіріп жатқанда 107 арнайы техниканы көмек ретінде жөнелткенбіз. Алдағы уақытта да мұндай көмек тоқтамайтынын айтқым келеді. Әлі де облыс көлемінде ұйымдастырылатын болады,-деді Жамбыл облысы әкімдігі аппаратының бөлім басшысы Нұрбол Тоқтыбаев.

Атырау облысына жіберілген жәрдемнің ішінде 500 киім, 200 төсек жабындысы, 180 көрпе бар. Бұл бұйымдар бұрын сотты болып, бүгінгі күні пробациялық есепте тұрған әйелдердің қолымен тігілген. Осылайша жергілікті билік алыстағы ағайынды ғана емес, облыстағы кісен тағылған екі қолға бір күрек таба алмаған жандарды да бірдей жарылқап отыр. 

Айта кетейік, сәуір айында әулиеаталықтардың атынан қызыл сумен арпалысып жатқан Атырау облысының тұрғындарына 70 тоннаны құрайтын гуманитарлық көмек жөнелтілген еді. Қайырымдылық шарасына облыстық мәслихат депутаттары, облыстық Қазақстан халқы Ассамблеясының этномәдени бірлестіктері, еріктілер, қоғам белсенділері атсалысқан.