Жамбыл облысының Жалғызтөбе ауылдық округінде прокуратура органдарымен мемлекетке қайтарылған қаражат есебінен салынған су құбыры желілері мен су жинау құрылыстарының салтанатты ашылуы өтті, деп хабарлайды Jambylinfo.kz 

Іс-шараға Байзақ ауданының прокуроры мен әкімі, сондай-ақ ауылдың құрметті тұрғындары мен ақсақалдары қатысты.

Жоба аясында Төрткөл ауылының 274 тұрғыны сапалы ауыз сумен қамтамасыз етілді.

Атап өту қажет, аталған өңірде тұрғын үй-коммуналдық шаруашылық саласында құрылыс жұмыстары 20 жылдан астам уақыт бойы жүргізілмеген.

Қазіргі таңда облыста денсаулық сақтау және сумен жабдықтау салаларында 19 әлеуметтік жоба іске асырылуда.

Қайтарылған активтер есебінен жүзеге асырылып жатқан әлеуметтік жобалардың іске асырылу барысы Жамбыл облысы прокуратурасының бақылауында.