Жамбылдық спортшы Нұржан Асан АҚШ-та өткен грек-рим күресінен халықаралық турнирдің күміс жүлдегері атанды, деп хабарлайды Jambylinfo.kz

Америка Құрама Штатының Нью-Йорк қаласында грек-рим күресінен «BILL FARRELL Memorial» халықаралық турнирінің жалауы желбіреген болатын.

Аталған байрақты бәсекеде ел намысын 87 келі салмақта жамбылдық Нұржан Асан қорғап күміс жүлдеге ие болды.

Спортшының жеке бапкері Қазақстан Республикасының еңбек сіңірген жаттықтырушысы - Ринат Исмаилов

Алғашқы айналымда американдық Christian Frederico-дан 12:3 есебімен басым түссе, екінші белдесуде жергілікті балуанға еш мүмкіндік бермей 10:0  есебімен жеңіске жетті.

Алайда ақтық сында украиналық Artur Ovsepyan-ға ұпай санымен есе жіберіп күмісті қанжығалады.

Айта кетейік, аталған турнирге Солтүстік және Оңтүстік Америка, Европа, Азия елдерінен  20-дан астам мемлекет, 300-ден аса  спортшы қатысқан болатын.