12-14 қыркүйек күндері Тараз қаласында 2010-2015 жылы туған жасөспірімдер арасында бокстан республикалық ашық турнир өтті. Бұл додада Жуалы ауданынан барған жас спортшылар үздік нәтиже көрсетіп, жеңімпаз атанды, деп хабарлайды Jambylinfo.kz 

Тараз қаласында өткен аталған турнирге еліміздің әр аймағынан келген сегіз команда, барлығы 120 жас спортшы қатысып, өзара бақ сынады.

Жамбыл облысы әкімдігінің білім басқармасына қарасты Жуалы ауданы білім бөлімінің «Аула» клубы атынан 30 жас боксшы бақ сынап, олардың 28-і жеңіс тұғырынан көрінді. Жуалылық өрендер 8 алтын, 7 күміс және 13 қола медаль иеленіп, жоғары нәтиже көрсетті.

Турнир қорытындысы бойынша «Аула» клубының шәкірттері жалпы есепте үздік атанып, «Үздік команда» атағына ие болды. Сондай-ақ бокс үйірмесінің жетекшісі Бауыржан Сатаровтың еңбегі ерекше бағаланып, ол арнайы қара белбеу және кубокпен марапатталды.