Осыған орай, жауынгерлік қызметте көзге түсіп, қоғамдық тәртіпті сақтауға септігін тигізген әскери қызметшілер Ішкі істер министрлігі мен Ұлттық Ұлан Бас қолбасшысы атынан арнайы наградалармен марапатталды, деп хабарлайды Jambylinfo.kz 

Мереке аясында еліміздің әр өңірінен Ұлттық Ұлан қатарына шақырылған жас өрендер ант қабылдап, азаматтық борышын өтеуде.

Қазір Ұлттық Ұланда 13 мың 500-ге жуық әскер мерзімді қызмет атқарады. Оларға қоғамдық тәртіпті қамтамасыз ету, мемлекеттік нысандардың қауіпсіздігі және қарулы қақтығыстарды болдырмау сынды маңызды міндеттер жүктелген.

Өткен бір жылда жасақтың кинолог мамандары мен қызметтік иттер 100-ден астам із-кесу оқиғаларына жұмылдырылды. Қызметтік иттер көмегімен 40 келіден астам есірткі, 1,2 келі жарылғыш зат, 74 оқдәрі, 15 атыс және суық қаруы табылды. 81 қылмыс ашылып, 69 қоғамдық тәртіп бұзушы ұсталды.

Ұлттық Ұлан қатарындағы қызмет ел алдындағы борышты өтеумен ғана шектелмейді. Биыл мерзімді қызметін аяқтаған 627 әскери қызметшіге жоғары оқу орындарынан білім гранттары берілсе, тағы 500-ге жуық сарбаз келісім-шарт негізінде қызметін жалғастырады.