Талғарда бір топ кісі қолынан қаза тапқан Шерзат Болаттың әкесі құзырлы органдарға сенбейтінін айтты, – деп хабарлайды Jambylinfo.kz  Massaget.kz ке сілтеме жасап 

"Құзырлы органдарға сене алмаймын. Ақиқатқа өз күшіммен жетемін. Сол үшін өзімді сақтап отырмын. Мен де жетім емеспін. Көріп отырсыз ғой, жора-жолдасым бар, бірақ менің айтатыным – біреудің жолын кескенім жоқ, біреудің обалына қалғаным жоқ, еш жерде ұрлық жасағаным жоқ, біреудің әкесін-шешесін боқтағаным жоқ. Болатын іс болды енді. Соңын күту керек", – деді ол.

Еске салайық, бұған дейін Шерзат Болаттың үйі өртеніп кеткенін хабарлаған едік.

Бұл туралы әуелі әлеуметтік желіде хабар тарады. Куәгерлердің сөзінше, үй тегіс өртеніп кеткен.

Бөтеннің мүлкін қасақана жою дерегі бойынша полиция қылмыстық іс қозғады. Тергеу аясында куәгерлерден жауап алынып, сондай-ақ бейнебақылау камераларының жазбалары зерттеліп жатыр. 

Марқұмның отбасын полиция күзететін болды.

Осы оқиғадан кейін Бас прокуратура мәлімдеме жасады.

"Талғарда жасөспірімді өлтіру ісі бойынша жәбірленушілердің үйін өртеу фактісіне қатысты 2024 жылғы 12 қазанда Бас прокуратураның басшылығымен қылмысты ашу үшін ведомствоаралық жедел-тергеу тобы құрылды. Кінәлілерді әшкерелеу үшін барлық шаралар қабылданатын болады. Қылмыстық iс Қазақстан Республикасы Бас Прокурорының бақылауына алынды", – делінген хабарламада.

Марқұмның әпкесі Перизат Нұрымова оқиға орнына барған Massaget.kz тілшісіне сұхбат берді.

Оның айтуынша, олар бұл үйге бір аптаға жуық уақыт келмеген, бірақ дәл кеше осында Құран оқытпақшы болып, тазалап кеткен.

"Күйеуім мен балаларым тек малға келіп кететін. Ит, мысықтарымыз бар осы жақта. Тамақтарын беріп, жарты сағат, бір сағатқа келіп кететін. Кеше балалар қалмақшы болған, бірақ қалдырмадым. Балаларды апарып тастап, әрі қарай жұмысқа кеткенмін. 22:30-да жұмыста болдым, 00:30-дарда жеңгем "Ағаңды біреу шақырып кетті, кім екенін білесің бе? Саған айтады ғой" деп хабарласты. Сосын: "Жоқ, қазір хабарласамын" дедім, ағам алмады. Артынан жеңгем "Перизат, біреулер кіші үйді өртеп кетіпті" деді. Басында сенген жоқпын. Жай ғана кішігірім бірдеңені жаққан шығар деп ойладым" , – деді ол.

Ол сонымен бірге үйдің дәл Шерзаттың жеті күндік асы күні өртенгенін айтты.

"Бүгін негізі – Шерзаттың "жетісі" ғой. Жетісін Талғарда қайтқан күні таратып жіберген болатынбыз, бірақ мына үйден "Иіс шығарайық" деп дайындалған едік. Іштің бәрін сыпырып, жуып, тазалап кеттік. Кешке дейін осында болдық", – деді ол.