22 сәуірде Атыраудағы Халел Досмұхамедов атындағы университеттің апатты деп танылған жатақханасының бір бөлігі құлап қалды. Оқиға кезінде жатақханада студенттер болмағандықтан, адам шығыны жоқ, - деп хабарлайды Jambylinfo.kz  inbusiness.kz сілтеме жасап.

Іргетасы ескіріп, апатты деп танылған № 2 жатақхананың 5 қабатты ғимараты 1972 жылы салынған. 

Университеттің шаруашылық бөлімі 2022 жылдың қараша айында № 2 жатақханадағы 1-қабатының қабырғасында ақаудың пайда болғанын анықтады. Осы жағдай анықталған соң мемлекеттік сатып алу порталы арқылы жатақхананың техникалық қауіпсіздігіне сараптама жүргізуге конкурс жарияланды. 2023 жылғы 21 ақпандағы № 138 келісімшартқа сәйкес "PFA compani" ЖШС техникалық зерделеу жұмыстарын жүргізіп, ғимараттың апатты жағдайда екені расталды. Студенттердің бәрі басқа жатақханаларға көшіріліп, орналастырылды, — деп хабарлады университеттің баспасөз қызметі.

Қазір Атырау облысында апатты жатақхананың ғимаратын cүріп, орнына студенттерге арналған 1000 орындық жатақхана салу жұмыстарына дайындық басталды. Облыстың құрылыс басқармасы қажетті жобалық-сметалық құжаттама әзірледі. Ал, жаңа жатақхананың жобалаушысы ретінде "Авангард ОК" ЖШС белгіленген және жоба қазіргі уақытта қажетті сараптамалардан өту үшін жолданды.

"Апатты деп танылған № 2 жатақхана айналасы қоршалған. Жатақхананың құлағанынан ешкім зардап шеккен жоқ", – деді университеттің баспасөз қызметі.