Ookla халықаралық аналитикалық компаниясы 2025 жылдың қаңтарына арналған Speedtest Global Index рейтингін жариялады. Бұл тізімде Қазақстан өз позициясын айтарлықтай жақсартып, интернет жылдамдығы бойынша жоғары нәтиже көрсетті, - деп хабарлайды Jambylinfo.kz

Мобильді интернет бойынша еліміз 8 сатыға көтеріліп, 49-орынға тұрақтады. Орташа жүктеу жылдамдығы 81,58 Мбит/с, жіберу жылдамдығы 18,42 Мбит/с, ал кідіріс 18 мс деңгейінде тіркелді. Фиксирленген кеңжолақты интернет санатында Қазақстан 5 орынға жоғарылап, 83-орынды иеленді. Бұл сегментте жүктеу жылдамдығы 77,93 Мбит/с, жіберу жылдамдығы 80,83 Мбит/с, ал кідіріс 5 мс болды.

Интернет жылдамдығының артуы – мемлекеттік бағдарламалар мен байланыс операторларының телекоммуникациялық инфрақұрылымды дамытуға бағытталған жұмысының нәтижесі. Өткен жылы фиксирленген байланыс желілері жаңғыртылып, 4G желісінің қамту аймағы кеңейтілді, сондай-ақ ірі қалаларда 5G технологиясын енгізу басталды. Бұл шаралар Қазақстанның интернет сапасын халықаралық деңгейде жақсартуға ықпал етті.

Бұдан бөлек, "Қолжетімді интернет" ұлттық жобасы аясында 2025-2027 жылдары ауқымды бастамалар жүзеге асырылады. Жоспар бойынша 3010 ауылға оптикалық-талшықты байланыс желісі тартылады, 1120 ауылда интернетті әр үйге дейін жеткізу үшін "соңғы миля" жобасы субсидияланады. Сондай-ақ, 5G желісі Астана, Алматы, Шымкент қалаларында және облыс орталықтарында кеңейтіліп, 250-ден астам шалғай елді мекен спутниктік интернетпен қамтылады.

Жылдам әрі сапалы интернет – IT-индустрияның дамуына, онлайн білім беруге, электрондық коммерцияны ілгерілетуге және экономиканың басқа да маңызды салаларына оң әсер етеді. Министрлік интернет сапасын жақсарту жұмыстарын жалғастыратынын мәлімдеді.

Айта кетейік, Ookla – интернет жылдамдығы мен сапасын талдауға маманданған халықаралық жетекші компания. Ол Speedtest қызметімен танымал, бұл сервис пайдаланушыларға интернеттің жүктеу және жіберу жылдамдығын, сондай-ақ кідіріс деңгейін тексеруге мүмкіндік береді. Speedtest Global Index ай сайын әлем елдеріндегі интернет сапасын бағалап, объективті рейтинг жасақтайды.