Бұл жолы Сирия мен Израиль арасындағы демаркациялық аймақта бейбітшілік пен тұрақтылықты сақтау мақсатында 139 қазақстандық әскери қызметкер сапарға аттанды, деп хабарлайды Jambylinfo.kz.

Бұл – Қазақстанның халықаралық қауіпсіздікке қосқан кезекті нақты үлесі. Бейбітшілік пен тұрақтылықты басты құндылық санайтын ел ретінде Қазақстан бұл бағытта тек дипломатиялық мәлімдемелермен шектелмей, нақты қадамдар жасап келеді.

Миссия қандай міндет атқарады?

БҰҰ-ның UNDOF операциясы 1974 жылдан бері Сирия мен Израиль арасындағы қақтығыс аймағында жүргізіліп келеді. Гольан биіктіктеріндегі жағдай – Таяу Шығыстағы ең күрделі мәселелердің бірі. Осы аймақтағы тыныштықты сақтау, екі тарап арасындағы қақтығыстардың алдын алу және гуманитарлық қолдау көрсету – негізгі мақсаттар қатарында.

Қазақстандық бітімгерлердің міндеті де осы бағытта: бақылау аймағын патрульдеу, блок-бекеттерді күзету, жарылғыш заттарды залалсыздандыру, сондай-ақ БҰҰ қызметкерлері мен бейбіт тұрғындарды қорғау.

Гендерлік теңдік: Әйелдер алғаш рет миссияға қатысуда

Биылғы миссияның ерекшелігі – құрамда әйел әскери қызметшілердің болуы. Бұл Қазақстан армиясының ішкі реформалары мен гендерлік теңдік қағидаттарына бейілділігін көрсетеді. Әйел бітімгерлердің қатысуы халықаралық стандарттарға сай келіп қана қоймай, жаһандық қауіпсіздік жүйесінде әйелдердің рөлін арттыру жолындағы маңызды қадам саналады.

Жамбылдық жауынгерлер де сапта

Ерекше атап өтерлігі — бітімгерлер қатарында «Оңтүстік» өңірлік қолбасшылығының тоғыз жауынгері бар. Бұл сарбаздар Қазақстандағы жалғыз таулы-егерлік полктің өкілдері.  Бітімгерлік топтағы ең жас жауынгер — 23 жастағы сержант Олжас Рахатов, ол Шоқан Уәлиханов атындағы Кадет корпусын тәмамдаған. Бұл — оның шетелдегі алғашқы іссапары. Ал ең тәжірибелі жауынгер — 43 жастағы сержант Нүркелді Омаров, артиллериялық батареяның старшинасы. Ол — бес баланың әкесі. Отбасы мүшелері оның туған күнін бейнебайланыс арқылы құттықтамақ. Барлық сарбаздар бір жыл бойы шетелде қызмет атқарады. Олардың төртеуі бойдақ болса, қалғандары — отбасылы. Отбасынан алыста жүрсе де, олар борыш пен ел алдындағы міндеттің бәрінен биік екенін жақсы түсінеді. Жыл бойы олар патрульдеу, жарылғыш заттарды залалсыздандыру, БҰҰ персоналын қорғау және гуманитарлық көмек көрсету сынды күрделі міндеттерді орындайды.

Сержант Билал Самбиев, штабтық ротаның бөлімше командирі:

«Бұл миссияға мен көптен дайындалдым. Елге абыроймен оралған сәтте барлық тапсырмаларды адал орындадым деп айта алсам – ең үлкен жетістік сол болмақ», – дейді.

Ал ефрейтор Ерғали Ятаев, таулы-атқыштар ротасының аға механик-жүргізушісі:

«Әйелім мені ұзақ сапарға шығарып саларда қатты уайымдады. Бірақ ол менің бұл сапарға деген көзқарасымды біледі. Мұндай мүмкіндік жауынгерге күнде берілмейді. Отбасым менімен мақтанады», – деп ағынан жарылды.

«Оңтүстік» қолбасшылығының бітімгерлері арасында медицина саласының өкілдері де бар. Сержант Елшібек Естемес — медициналық взводтың фельдшері. Сондай-ақ сержант Нұрсұлтан Қоныратбай – таулы-егерлік ротаның бөлімше командирі, сонымен бірге медициналық білімі бар. Ол саперлік міндеттермен қатар, алғашқы медициналық көмек көрсете алады.

Сондай-ақ Алексей Стельмах – аға сержант, жауынгерлік және дене дайындығы бойынша нұсқаушы, Арман Дұсмаилов – аға барлаушы ефрейтор, Нұржігіт Сейсен – механик-жүргізуші. Барлығы — кәсіби деңгейі жоғары, нағыз патриот сарбаздар.

Президент пен Қорғаныс министрінің жоғары бағасы

Мемлекет басшысы Қасым-Жомарт Тоқаев бірінші ротация сарбаздарын елге оралған сәтінде қабылдап, олардың жауынгерлік борышын адал атқарғанын атап өткен болатын:

«Қарулы Күштер – еліміздің егемендігі мен тәуелсіздігінің тірегі. Армияның қуаты — сарбаздардың рухы мен тәртібіне тікелей байланысты», — деген еді Президент.

Ал Қорғаныс министрі, генерал-полковник Руслан Жақсылықов өз сөзінде Қазақстанның тарихында тұңғыш рет қару-жарағы мен техникасы бар толыққанды ұлттық бітімгерлік контингенттің құрылуы — ел армиясының дамуындағы жаңа белес екенін атап өтті.

Сыртқы саясаттағы сенімділік

Мамандардың айтуынша, бұл қадам Қазақстанның халықаралық қауымдастық алдындағы беделін арттырып отыр. Саясаттанушы Айдана Мұратқызының айтуынша, "Қазақстан жаһандық деңгейде бейбітшілік пен қауіпсіздікті қамтамасыз ету ісіне нақты үлес қосып келеді. Бұл тек сыртқы саясаттың бір тармағы емес, сонымен қатар ұлттық мүддені қорғаудың жаңа форматы".

Қазақстан бұған дейін де Ливандағы БҰҰ миссияларына қатысқан. Ал Сирия мен Израиль шекарасындағы UNDOF — ел әскерінің кәсіби дайындық деңгейін жаңа деңгейге көтеретін алаң.

Әлемдік мойындау

UNDOF миссиясы басшылығы қазақстандық контингенттің тәртібі мен жауапкершілігіне жоғары баға беріп келеді. Бұған дейінгі бітімгершілік операцияларында отандастарымыз өздерін сабырлы, кәсіби әрі тәртіпті сарбаздар ретінде көрсетті. Қазақстанның бұл қадамы бір ғана әскери шешім емес – бұл халықаралық ынтымақтастықты нығайту, жаһандық тұрақтылықты қолдау және гуманитарлық міндеттемелерді орындау жолындағы ұстанымның жалғасы. БҰҰ аясындағы бастамалар арқылы еліміз Таяу Шығыс сияқты тұрақсыз аймақтарда бейбітшілік орнатуға ниетті ел екенін тағы бір дәлелдеді.  Бұл елдің бейбітшілікке бейілділігі мен халықаралық қауіпсіздікке белсенді үлес қосуға дайын екенінің көрінісі. Ал оның ішінде Жамбыл өңірінің сарбаздары да өз отаны мен халқының намысын қорғап, жаһандық бейбітшілік жолында аянбай еңбек етуде.