Бүгін - Дүниежүзілік аллергия күні

Жаңалықтар

Бүгін - Дүниежүзілік аллергия күні

авторjambylinfo.kz
8 шілде, 2021
168

Бүгін - Дүниежүзілік аллергия күні

Дүниежүзілік аллергия күні 8 шілдеде жыл сайын дәстүрлі түрде аталып өтеді. Аллергия күнін белгілеудің өзі әлемде осы дертке шалдыққандар қатарының жыл сайын артып келе жатқандығын білдіреді. ДДСҰ аталған аурумен күресті күшейтуге назар аудартып, ем-шарасын жетілдіру мақсатында 2000 жылы 8 шілдені ресми бекітті. Биыл бұл күн қалыптасқан жағдайға байланысты «Аллергиямен ауыратындарға қамқорлық жасау COVID-19 кезінде де тоқтатылмайды» деген ұранымен өтуде. Кардиология және ішкі аурулар ҒЗИ республикалық аллергологиялық орталығының басшысы, ҚР аллергологтар, иммунологтар мен иммунореабилитологтар қоғамының төрағасы, медицина ғылымдарының докторы, профессор Таир Нұрпейісовтың айтуынша, осы кезең аллергиялық аурулардың ең көп таралуына себеп болатын арамшөптердің гүлдену кезеңінің басталуына сәйкес келетіндігін ескере отырып, қауіпсіздік шараларын ұстанған жөн. «Жалпы аллергияның вакцина жасауға және COVID-19 қарсы вакцина жасауға қарсы көрсеткіштері жоқ. Республикалық аллергология орталығы мамандарының ұстанымы халықаралық мәліметтермен, оның ішінде Еуропалық аллергология және клиникалық иммунология академиясының (ЕАКИА) келісім құжатында жарияланған мәліметтермен сәйкес, яғни вакциналармен немесе инъекциялық дәрі-дәрмектермен байланысты емес респираторлық, тағамдық (соның ішінде тауық жұмыртқасына), эпидермальдық, жәндіктерге, сондай-ақ латекске болатын аллергиялық реакциялар COVID-19 вакцинасына қарсы көрсеткіш емес. Аллергиялық аурулардың асқынуы вакцина жасауға уақытша қарсы көрсеткіш болып табылады. Мұндай пациенттерге ауру симптомдарының болмаған кезінде вакцина жасауға болады. Уақытша медициналық қарсы көрсеткіштің ұзақтығын тікелей дәрігер шешеді»,- дейді дәрігер. Сонымен қатар, ол бронх демікпесі, оның ауыр түрі вакцина жасау үшін қарсы көрсеткіш емес екенін тілге тиек етті. Бірақ вакцина жасар алдында аурудың деңгейін бағалау үшін дәрігерге қаралған жөн. Дегенмен, кез келген вакцинаға, COVID-19-ға да қарсы вакцина жүргізген кезде қарсы көрсеткіштер болады: - Вакцинацияға абсолютті қарсы көрсеткіш - адамның өміріне қауіпті ауыр реакцияларға шалдыққандардың (анафилактикалық шок, асфиксиямен болатын Квинке ісігі, Лайелл синдромы және т.б.), расталған құжаттарының, сондай-ақ вакцинаның компоненттеріне жеке төзбеушілігінің болуы. Вакцинаның әр түрінің компоненттері түбегейлі ерекшелінеді, сондықтан Қазақстанда қолжетімді басқа өндірушінің вакцинасын таңдай аласыз. - Вакцинация жасауға уақытша қарсы көрсеткіш - созылмалы (оның ішінде аллергиялық) аурулардың асқынуы. Бұл жағдайда вакцина жасауды 2-4 аптаға шегеріп, дәрігерге қаралып және емдеу курсынан өткен дұрыс. «Халық арасында вакцина жасаған кезде жедел реакция болады деген қорқыныш бар. Әдетте, жіті анафилактикалық реакция инъекция жасағаннан кейін 5-20 минут өткен соң пайда болады, көп жағдайда бірден болады. Бұл кезде адамдар вакцина жасалған жердегі медицина қызметкелерінің бақылауында болады. Егер сіздің анамнезіңізде аллергиялық ауру бар болса, вакцинацияны медицина ұйымдарында жасағаныңыз дұрыс (тіпті стационардың жанындағы емханалардың базасында жасауға да мүмкіндік бар)»,-дейді Таир Нұрпейісов. Сонымен қатар, маман аллергиктерге арналған қажетті кеңестер ұсынды: - Аллергиктер аллергиясы жоқ адамдарға қарағанда КОВИД-19 жиі ауырады. Демікпеге қарсы препараттарды қабылдау тіпті коронавирустық пневмонияның жеңіл ағымына әсер ете алады. - Аллергиялық риниттің белгілері COVID-19 симптомдарына ұқсас болуы мүмкін (иіс пен дәмді сезбеу, жөтел, әлсіздік, дене қызуы, бас ауруы және т.б.). - Антибиотиктер аллергиялық реакцияның себебі ретінде басқа дәрілердің ішінде бірінші орында (80%-ға дейін) тұр. Профилактикалық мақсатта антибиотиктерді қабылдамаңыз, өз бетінше емдеумен айналыспаңыз, бұл өте қауіпті болуы мүмкін! - Аллергиялық ауруларды, оның ішінде демікпені емдеу КВИ қаупінен тоқтатылмауы тиіс. Аллергологтың нұсқауларын орындаңыз, базистік терапияны қабылдаңыз! - Аллергиялық аурулардың қатты асқынуын күтпей-ақ, аллергологтан алдын ала консультация алыңыз. - Егер сіз аллергияға шалдығып, басқа препараттарды шұғыл қабылдауға мұқтаж болсаңыз, бұл ретте олардың қауіпсіздігіне сенімді болмасаңыз – оларды қабылдауды заманауи антигистаминді дәрілік заттар (мысалы, левоцетиризин) аясында бастаңыз. Олар шоктың даму қаупі мен басқа аллергиялық асқынулардың қаупін азайтады. - Биологиялық белсенді қоспалар, поливитаминдер және өсімдіктен жасалған препараттардан бас тартыңыз – олардың пайдасы болуы мүмкін, алайда қауіптілігі нақтырақ. - «Табиғатта», ауылшаруашылық жұмыстарында, өсімдік, жәндіктермен тығыз байланыста болуды шектеңіз. - Өзіңізді хлордан және қоғамдық орындарда себілетін басқа антисептиктерден қашықта ұстаңыз, олар денсаулыққа зиян келтіруі мүмкін, үйде химияны пайдалануды шектеңіз. - Диета ұстаңыз. - Дүрбелеңге жол бермеңіз, аллергияны тоқтатуға арналған дәрілік заттар қолжетімді және олар сатылымда бар. - Ғаламтордағы «сарапшылардың» «пайдалы» кеңесін тыңдамаңыз. Мамандармен кеңесіңіз.