Жергілікті тұрғындар негізінен мал шаруашылығымен айналысады. Соңғы жылдары округте ауыл шаруашылығы, инфрақұрылым және әлеуметтік салада бірқатар маңызды жобалар жүзеге асырылып, ауылдың даму қарқыны айтарлықтай артқан, - деп хабарлайды Jambylinfo.kz

Билікөл ауылдық округі төрт елді мекеннен тұрады: Қарабастау, Дарбаза, Жылыбұлақ және Әбдіқадыр. Округ орталығы – Қарабастау ауылы. Мұнда 1547 тұрғын бар, оның ішінде 347 жас, 284 зейнеткер және 620 экономикалық белсенді азамат тіркелген. 347 жас азаматтың басым бөлігі мектеп оқушылары мен студенттер.

Мұнда ауыл тұрғындарына 11 мемлекеттік мекеме қызмет көрсетеді. Олардың қатарында мектептер, дәрігерлік амбулаториялар, мәдениет үйлері, цифрландырылған орталықтар мен спорт нысандары бар. Цифрландырылған орталықтар ауыл тұрғындарына онлайн қызметтерді пайдалануға мүмкіндік береді. Округте әлеуметтік және инфрақұрылымдық жобалар тұрақты жүзеге асырылып, халықтың өмір сүру сапасын жақсартуға бағытталған.

Өткен жылы Билікөл ауылдық округінде инфрақұрылымды дамыту бағытында маңызды қадамдар жасалды. Ауыл тұрғындарының көптен күткен газдандыру жұмыстары қолға алынып, Қарабастау мен Жылыбұлақ ауылдарына табиғи газ тартылды. Бұл жаңалық жергілікті халық үшін үлкен қуаныш болды, өйткені көгілдір отынның келуі ауыл тұрғындарының тұрмыс сапасын едәуір жақсартады. Бұрын көмір мен отынға тәуелді болған халық енді экологиялық таза әрі үнемді отын түрін пайдалану мүмкіндігіне ие болды.
Газдандыру жұмыстары мұнымен тоқтап қалмайды. Биыл Әбдіқадыр мен Дарбаза ауылдарына газ тарту жоспарланып отыр. Бұл өз кезегінде ауылдық округтің толық газбен қамтылуына жол ашады. Жоба жүзеге асқан жағдайда, округ тұрғындарының өмір сүру деңгейі едәуір артып, тұрмыстық жағдайлары жақсарады.

Әлеуметтік саланы дамыту бағытында да бірқатар жұмыстар атқарылды. Қарабастау ауылында 20 келушіге арналған жаңа фельдшерлік пункт ғимараты пайдалануға берілсе, ал Жылыбұлақ ауылында жаңа дәрігерлік амбулатория салынды. Бұл жергілікті тұрғындар үшін сапалы медициналық қызмет алуға мүмкіндік береді. 

Сонымен қатар, «Ауыл – Ел бесігі» бағдарламасы аясында Қарабастау ауылының негізгі көшелері жөнделіп, жол сапасы айтарлықтай жақсарды. Дарбаза су тоспасынан 2,3 шақырым лоток каналы салынды, ал Дарбаза ауылына кіреберіс және шығыс жолдары толықтай жөндеуден өтті. Қарабастау ауылында 1,2 шақырым жолға қиыршық тас төселіп, ауыл ішіндегі көлік қатынасы жақсарды.

Ауылдық округте әлеуметтік бастамалар да қарқынды жүзеге асуда. Жергілікті кәсіпкерлер мен меценаттардың қолдауымен қайырымдылық шаралары ұйымдастырылып, 6,2 миллион теңге көлемінде көмек көрсетілді. Сондай-ақ, 10 миллион теңгеге Ұлы Отан соғысы ардагерлеріне арналған ескерткіш орнатылды. Бұл – ауыл халқының тарихқа деген құрметінің көрінісі.

Билікөл ауылдық округінде қолға алынған бұл жобалар – ауылдың тұрақты дамуына бағытталған жүйелі жұмыстың нәтижесі. Инфрақұрылым мен әлеуметтік саланы жетілдіру ауыл тұрғындарының күнделікті өмірін айтарлықтай жеңілдетіп, болашаққа жаңа мүмкіндіктер ашады. Газдандырудың қолға алынуы ауыл халқының тұрмыс сапасын арттырып, экологиялық таза отынға көшуге жол ашты. Сонымен қатар, жол жөндеу, жаңа әлеуметтік нысандардың салынуы және ауыл шаруашылығын қолдау – аймақтың экономикалық және әлеуметтік дамуының айқын көрсеткіші. Алдағы уақытта да ауылды кешенді дамытуға бағытталған жаңа жобалар жүзеге асырылып, халықтың әл-ауқатын жақсартуға басымдық берілмек.