Түркістанда Бекзат Саттархановты еске алуға арналған XXIII халықаралық бокс турнирі басталды, - деп хабарлайды Jambylinfo.kz

Түркістан қаласындағы «Olympic Center» спорт кешенінде 2007-2008 жылы туған жасөспірімдер арасында бокстан халықаралық турнир басталды.

Сидней-2000 Олимпиадасының чемпионы, «Барыс» орденінің алғашқы иегері, қазақ боксының жарық жұлдызы Бекзат Саттархановты еске алуға арналған бұл жарыс биыл 23-рет ұйымдастырылып отыр. Турнирге Қазақстанның барлық өңірлерінен келген былғары қолғап шеберлерімен қатар Ресей, Өзбекстан, Қырғызстан, Моңғолия, Тәжікстан, Әзірбайжан, Қытай, Египет, Сауд Арабиясы және Кувейт елдерінің спортшылары қатысуда.

Жарыста 30 командадан 300-ге жуық боксшы бақ сынап жатыр. Ерлер 13 салмақ дәрежесінде, ал қыздар 6 салмақта өзара мықтыны анықтайды. Әлем чемпионы Қайрат Ералиевтің айтуынша, бұл жарыста жеңімпаз атанған спортшыларға спорт шебері атағы беріледі.

Турнирдің ашылу салтанатында Сидней Олимпиадасына қатысқан танымал боксшылардың барлығы дерлік бой көрсетті. Олардың қатарында Ермахан Ибраимов, Мұхтархан Ділдәбеков, Нұржан Каримжанов, Олжас Оразалиев және Данияр Мұнайтпасов болды.

Турнир 31 наурызда басталып, 4 сәуірде – Бекзат Саттархановтың туған күнінде аяқталады.