Жамбыл облысы ПД бастығы Бақытжан Малыбаев аймақтағы қарлы боран кезінде халыққа көмек көрсеткен жол сақшысы Серік Есенғалиді арнайы марапаттады, деп хабарлайды Jambylinfo.kz.

Жиында  Бақытжан Малыбаев Серік Есенғалидың қызметіне адалдығы мен адамгершілігін ерекше атап өтті.  

— Бұл тек қызметтік міндет емес, жоғары адамгершілік пен жанашырлықтың көрінісі. Осы арқылы ол полиция қызметінің халықтың қауіпсіздігін қорғаудан басқа, елдің мәдениеті мен қонақжайлығын әлемге паш ете білді. Бұл — біз үшін мақтаныш, әріптестерімізге үлгі болатыны сөзсіз, — деді Бақытжан Малыбаев.

Еске салайық, 23 қаңтар күні Серік Есенғали  боранда қалып қойған шетелдік туристер мен алматылық жас отбасыға көмек көрсетіп, оларды үйіне алып келіп, жылу мен қамқорлық танытты. Сондай-ақ, медициналық көмек көрсетуді ұйымдастырып, жолаушыларға жәрдем қолын созды.

Серік Есенғалидың бұл қайырымды әрекеті көпшіліктің көңілінен шығып, бұқаралық ақпарат құралдарында жарияланған соң халық оған «Міне, халық жанашыры», «көпке үлгі іс», «осындай мемлекеттік қызметкерлер көбейе берсін», «нағыз азамат» деп оң пікірлер мен алғыс білдірді.

Бақытжан БЕКБОЛАТ