Министр Е.Мырзабосыновтың қатысуымен бүгін Қазақстан ауыр атлетика федерациясының есеп беру конференциясы өтті, деп хабарлайды Jambylinfo.kz 

Жиында Жанат Түсіпбеков ұйым басшысы ретіндегі өкілеттігін мерзімінен бұрын аяқтағанын жариялап, өз орнына Гаджи Гаджиевтің кандидатурасын ұсынды. 

Министр Ербол Мырзабосынов ауыр атлетика федерациясын он жылға жуық басқарған Ж.Түсіпбековке жемісті қызметі үшін алғыс білдірді.

«Жанат Түсіпбековке ауыр атлетика саласына қосқан үлесі үшін алғыс айтамыз. Оның жетекшілігімен еліміздің спортшылары талай белестерді бағындырды. Ал жаңа басшы Гаджи Гаджиевтің федерацияны одан әрі дамыту жолында табысты жұмыс атқаратынына сенімдіміз», – деді.

Гаджи Гаджиев 1974 жылы 29 қыркүйекте дүниеге келген. 2003-2009 жылдары Қаржы және құқық институтын «Қаржы және несие» мамандығы бойынша тәмамдаған. 2013-2015 жылдары Қазақ қатынас жолдары университетінде «Көлік құрылысы» мамандығы бойынша білім алған. 11 желтоқсанынан бастап Қазақстан ауыр атлетика федерациясының президенті қызметіне кірісті.