Мәдениет және спорт министрлігі мәдениет, спорт және туризм салаларындағы білім беру ұйымдарында жоғары және жоғары оқу орнынан кейінгі білімі бар, сондай-ақ техникалық және кәсіптік, орта білімнен кейінгі білімі бар мамандарды даярлауға 2022 – 2023 оқу жылына арналған оқу гранттарын бөлу туралы бұйрық әзірледі, деп хабарлайды ҚазАқпарат. Атап айтқанда, биыл Қазақ ұлттық өнер университетіне 275 мемлекеттік білім гранты бөлінбек. Оның 204-і қазақ тілінде оқитын студенттер үшін. Аталған оқу орнына бөлінген гранттар: - музыка мұғалімдерін даярлау – 8; - орындаушылық өнер – 116; - режиссура, арт-менеджмент – 19; - дирижерлік мамандық – 15; - театр өнері – 24; - бейнелеу өнері – 28. Мүгедектігі бар адамдар үшін оқуға үш бағыт бойынша квота қарастырылған. Сондай-ақ ұлты қазақ, бірақ өзге ел азаматы болып табылатын студенттерге – 12, жетім балаларға – 3, көп балалы отбасылардан шыққан балалар үшін – 15, толық емес отбасылардан шыққан студенттерге – 3 квота бөлінбек. Барлығы – 40 квота. Ал Темірбек Жүргенов атындағы Қазақ ұлттық өнер академиясында биыл мемлекеттік грант бойынша – 260, квота бойынша – 40 қазақстандық оқи алады. Сонымен қатар Құрманғазы атындағы Қазақ ұлттық консерваториясында білім алуға ниетті жастар үшін - 219 грант және 31 квота бөлінбек. Халықаралық туризм және меймандостық университеті мемлекеттік грант шеңберінде 87 дене шынықтыру мұғалімін даярламақ. Бұған қоса аталған жоғары оқу орнына 13 квота бөлінген. Сондай-ақ министрлік бұйрығының жобасында магистратура және докторантура бағыттары бойынша гранттар қарастырылған. Бұйрықты ашық талқылау 15 тамызға дейін жалғасады.