– Біздің университеттегі Х.Та­был­диев атындағы Каспий өңірінің тарихы, археологиясы және этнологиясы ғылыми-зерттеу институтының үш ғылыми жетекшісі мен 20 студенті Мұқыр ауылдық округіне қарасты Қа­рақұдық участігіндегі қорғандарға қазба жұмысын жүргізді. Қазба жұ­мысы кезінде тарихи жәдігерлерге кезіктік. Мұнда сармат дәуіріне жататын жауынгерлердің сүйегі табылды, – дейді аталған ғылыми-зерттеу институтының директоры, тарих ғы­­лымдарының докторы Сайфолла Сапанов.

Оның мәліметінше, бір қорғаннан үш жауынгердің бірінің тұсынан қару-жарақтары мен екі мың жыл бұрынғы құмыра, төрт қойдың сүйегі табылып отыр. Қорғанда найза, белдікте пышақ, бір қорап жебе болған.

– Археологиялық экспедицияның бірінші кезеңінде бір қорғаннан осындай жәдігерлерді таптық. Бір қор­ғанда үш адамның жерленуі археологияда сирек кездеседі. Мұны біз сармат дәуіріндегі жауынгерлер деген тұжырым жасадық. Бір жа­уынгердің оң қолының білектен ке­сіл­геніне қарағанда, соғыста қаза табуы мүмкін. Қолбасшы болған шығар. Сол себептен, енді жауынгерлердің сүйе­гіне антропологиялық зерттеу жүр­гізіледі, – дейді археологиялық экспедиция жетекшісі Сайфолла Сапанов.

Экспедиция жетекшісінің пікіріне сүйенсек, енді археологиялық экспе­ди­цияның екінші кезеңіне археологтер тартылмақ. Оның арасында ха­лықаралық археологтер де бар.

– Сондай археологтың бірі – Б.Го­родивиков атындағы Қалмақ мем­лекеттік университетінің профес­со­ры, тарих ғылымдарының докто­ры Петр Кольцов. Жақында бұл ға­лым біздің экспедиция құрамына қо­сылып, қорғаннан табылған сармат дә­уіріндегі жауынгерлердің сүйегіне, өзге жәдігерлерге ғылыми-зерттеу, тал­­дау жүргізеді, – деген ойымен бө­лісті С.Сапанов.