Қазақстан Жазушылар одағының мүшесі, ақын Шырын Мамасерікованың «Елге деген махаббат» атты туындысының брайль қарпіндегі және аудио форматындағы үнтаспасының тұсаукесер рәсімі өтті, деп хабарлайды Jambylinfo.kz.

«Өлеңімнің әр жолы - өмірбаян» деп аталатын әдеби кеш барысында жинақтың тұсаукесерімен қатар ақынның балалық шағынан үзік сыр шертетін сахналық қойылым көрермендер назарына ұсынылды.

 Зиялы қоғам өкілдері, жергілікті қаламгерлер, әріптестері мен оқырмандар «Ақынға - 100 сұрақ» форматымен көкейкесті сауалдарын қою арқылы қаламгерді жан-жақты қырынан тануға мүмкіндік алды.

Бұл шараның басты мақсаты – «Ұлттық рухани жаңғыру» ұлттық жобасының «Әдеби өлкетану» бағытын жүзеге асыру, ақынның «Елге деген махаббат» кітабын зағип жандарға қолжетімді ету, қазақ әдебиеті мен мәдениетінің маңыздылығын арттыру, сондай-ақ, жастардың ғылымға, білімге қызығушылығын оятып, отаншылдық пен ұлттық рухты нығайту.

Әдеби кеште ұлтымыздың мәдени мұрасы дәріптеліп, қазақ руханиятының терең тамырларына бойлауға мүмкіндік алды.

Бақытжан Бекболат