ҚР Экология, геология және табиғи ресурстар министрлігінің Орман шаруашылығы және жануарлар дүниесі комитетінің төрағасы Данияр Тұрғамбаевтың айтуынша, Тұран жолбарысын қайта жерсіндіру мақсатында Іле-Балқаш мемлекеттік табиғи резерваты құрылған, - деп хабарлайды Jambylinfo.kz

Аталған бағдарлама аясында жолбарыстың табиғи қорегін қалпына келтіру үшін резерват аумағына 205 бас тоғай бұғысы жеткізілді. Сонымен қатар, 100-ден астам құлан қоныс аударса, еліктер мен қабандардың да саны арта түскен.

Өткен жылдың күзінде Іле-Балқаш резерватына арнайы торлы қоршауда өсіру үшін Нидерландтан екі жолбарыс әкелінсе, алдағы уақытта Ресейден тағы 3-4 жолбарыс жеткізілуі жоспарланып отыр.

Бұдан бөлек, елімізде Пржевальский жылқысын қайта жерсіндіру жұмыстары да қарқынды жүргізілуде. Бұрын бұл сирек кездесетін жылқылар Қазақстанның 9 облысын мекендеген.

Халықаралық ұйымдармен бірлескен ынтымақтастықтың нәтижесінде Қостанай облысындағы «Алтын Дала» резерватына Прага хайуанаттар бағынан 7 Пржевальский жылқысы әкелінді. Жалпы, 2029 жылға дейін олардың санын 40 басқа дейін жеткізу жоспарланған.