Түркістан облысында полиция онлайн ойын арқылы жасалған алаяқтық дерегін анықтады, деп хабарлайды Jambylinfo.kz 

Жетісай аудандық полиция бөліміне жергілікті тұрғын арыз түсіріп, банк есепшотынан белгісіз біреулердің заңсыз ақша шешіп алғанын мәлімдеген.

Анықталғандай, жәбірленушінің кәмелетке толмаған туысы телефон арқылы онлайн ойын ойнап отырған кезде оған бейтаныс адам хабарласқан. Ойын барысында күдікті түрлі «бонустар» мен «ұтыстар» ұсынатынын айтып, жасөспірімді алдап, банк картасының деректері мен телефонға келген SMS-кодты беруге көндірген. Соның салдарынан жәбірленушінің шотынан 380 мың теңге шешіп алынған.

Жедел-іздестіру шаралары барысында 20 жастағы Шымкент қаласының тұрғыны анықталып, полицияға жеткізілді. Күдіктіден алаяқтық әрекеттерде қолданылған бес ұялы телефон тәркіленген.

Киберпол қызметкерлерінің мәліметінше, күдікті онлайн ойын арқылы 60-тан астам жасөспіріммен байланысқа шығып, олардың 20-дан астамынан ақша алған.

 Сондай-ақ күдіктінің басқа да қылмыстарға қатысы бар-жоғы тексерілуде.