Ш.Уәлиханов атындағы Жамбыл облыстық әмбебап ғылыми кітапханасы «Жазушымен бір күн» жобасы аясында ақын, сазгер Болатбек Әбішевтің шығармашылығына арналған  «Өмір - дария, өмір - өлең» тақырыбында поэзия кешін ұйымдастырды, деп хабарлайды Jambylinfo.kz

  Кешке арнайы тұла бойына сөз өнерінің киесі қонып, сезім қылын шертер сазды әуеннің құдіреті дарыған ақынның замандастары Мойынқұм ауданының құрметті азаматтары Пернеш Қалыбаев, Болат Сатыбалдиев, Тұрсынбек Айдынбеков, «Әулие-Ата шайырлары» шығармашылық бірлестігінің бір топ ақындары Жорабек Әбдікерімов, Мұстафа Түлентаев, Алтай Байғожаев, Шахизад Акимов, Мұхит Есіркепов, Ерқадыр Жұмабаев, Асылхан Шүңіреков, Сенбай Алтын, Нақсұлу Ержігіт, Майра Жантлесова, Дәмегүл Бақытжанова  және ақын ағамыздың қызы Әбішева Айтгүл қатысып, Болатбек Әбішев жайлы кеңінен толғап, шығармашылығына тән өзіндік қолтаңбасы жөнінде сөз қозғады. Кеште әдемі естеліктермен өріліп, арнайы Кенен Әзірбаев атындағы Жамбыл облыстық филормония  әншісі Лаура Бексұлтанова, Мойынқұм аудандық мәдениет үйінен келген әншілер Қажымұрат Әбдіқадыров, Ерлан Айтқабыл, Мағжан Мәмбетәлиев  ақынның әні мен сөзіне жазылған әндерді шырқаса, кітапхана қызметкерлері ақын өлеңдерінен өрнектелген жыр кешінде қазақтың киелі қара өлеңінің құдіретін оқырман қауымға жеткізді.