Шерхан Мұртаза атындағы Халықаралық Тараз университетінде студенттер және өңірлік Қазақстан халқы Ассамблеясы «Ассамблея жастары» қоғамдық бірлестігі  белсенділерінің қатысуымен «Студенттік Ассамблея»: «Алтын шаңырақ» студенттер ассамблеясы ашылды, - деп хабарлайды Jambylinfo.kz

Келелі басқосуда «Қоғамдық келісім» мекемесінің  басшысы Мубарак Жинақбаева студенттік ассамблея этносаралық татулық пен келісімді нығайтуға, Қазақстанда өмір сүретін этнос өкілдерінің салт-дәстүрін, мәдениеті мен тарихын құрметтеуге бағытталған бастама екендігіне тоқталып, студенттік демократияны дамытудың да оңтайлы тетігіне айналатындығын жеткізді.

Сондай-ақ, басқосу барысында сөз сөйлеген ҚХА «Ассамблея жастары» республикалық қоғамдық бірлестігі төрағасының орынбасары және өңірлік жастар бірлестігінің төрайымы Хамида Турдыева да жастар алаңының ашылуымен құттықтап, қоғамдық келісім мен жалпыұлттық бірлікті нығайтуға бағытталған іс-шараларды бірлесе өткізетіндігіне сенім білдіретінін жеткізді.

Қазақстан халқы студенттік Ассамблеясының үлгілік ережесінің талаптарына сай «Алтын шаңырақ» студенттер ассамблеясының төрағасы болып Ш.Мұртаза атындағы Халықаралық Тараз университетінің «Мемлекеттік және жергілікті басқару» мамандығының І курс студенті, кәріс этносының өкілі Ким Аяна Радионовна сайланды.

Мұнан соң студенттік ассамблея құрамы бекітілді.