Әзербайжандық ADOG компаниясы мен Зира халықаралық порты Каспий мен Қара теңізді диаметрі 10 метр болатын жер асты тоннелі арқылы жалғайтын ауқымды жоба ұсынып отыр, - деп хабарлайды Jambylinfo.kz 

Идея авторларының айтуынша, тоннель Грузия немесе Ресей аумағы арқылы өтеді. Табиғи деңгей айырмасы арқасында Қара теңізден Каспийге су өздігінен ағады, яғни су айдайтын құрылғылар қажет емес.

Бастама Каспий теңізінің азайып бара жатқан су деңгейін тұрақтандыруды көздейді. Бұл экология, экономика және инфрақұрылымға қатысты қауіп-қатерлердің алдын алуға сеп болады.

Компания жоба аясында экологиялық қауіпсіздік пен биоәртүрлілікті сақтау шаралары толық ескерілетінін мәлімдеді. ADOG техникалық-экономикалық негіздеме әзірлеп, қажетті ресурстарды жұмылдыруға дайын екенін жеткізді.