Ұйымдастырушылардың айтуынша, барлық тиісті қызметтер – медицина, жедел жәрдем мен полиция дер кезінде әрекет еткен. Алайда барлық шараларға қарамастан, олардың өмірін сақтап қалу мүмкін болмады. Бұл туралы «Бірінші болуға батылдық» корпоративтік қоры мәлімдеді, - деп хабарлайды Jambylinfo.kz 

Жарыс парктен бастап (Тұңғыш Президент саябағы – ред.), Орталық стадионға дейінгі бағытта таңертең өткен. Аққоян Рсалиев 2021 жылдан бері 21,1 және 10 шақырымдық қашықтықтарға бірнеше рет жүгіріп шыққан тәжірибелі қатысушы болатын. Бүгін жарыстың алғашқы шақырымында – әл-Фараби даңғылының бойында өзін жайсыз сезініп, есінен танып қалған. Жедел жәрдем бір минут ішінде жеткенімен, ол кезде тамыр соғысы болмаған.

«Сағат 8:15-те полиция қызметкерлері қатысушының құлағанын хабарлады. Жедел жәрдем дереу жетіп, реанимация шаралары хаттамаға сәйкес жүргізілді. Алдын ала болжам – өкпе артериясына тромбоэмболия. Бұрыннан артериялық гипертензия диагнозы болған», – деді 2/51 бригадасының дәрігері Әлібек Хожаназаров.

Екінші көз жұмған – Нұрбол Ахмади. Бұған дейін ол 2025 жылғы Winter Run жарысында 10 шақырымға жүгіріп шыққан. Сондай-ақ, Астана мен Алматыда өтетін жартылай марафондарға және толық марафонға тіркеліп үлгерген. Бүгін Алматыдағы жарыс кезінде, 16-шақырымда есінен танып қалған. Оқиға орнына жеткен дәрігерлер реанимация жасағанымен, нәтиже болмады – ол жедел жәрдем жеткенге дейін жан тәсілім еткен.

«Біз оқиға орнына 9:18-де жеттік. Ұйқы артериясында тамыр соғысы болмады, дем алуы жоқ, қан қысымы – нөл. Хаттамаға сай реанимациялық шаралар жасалды. Бірақ нәтиже бермеді. Алдын ала болжам бойынша – өкпе артериясына тромбоэмболия, жүректің жіті жеткіліксіздігі», – деді 8/58 бригадасының дәрігері Айгерім Есдәулетова.

Дәрігерлердің айтуынша, нақты себеп сот-медициналық сараптамадан кейін белгілі болады. Қорытындысы жақын күндері марқұмдардың туыстарына жеткізіледі.

«Бірінші болуға батылдық» қорының атқарушы директоры Салтанат Қазыбаева қауіпсіздік – ұйымдастырушылар үшін басты назарда екенін айтты.

«Жарысқа тіркелу кезінде әрбір қатысушы өз денсаулығына жауапты екенін және жарысқа физикалық тұрғыда дайын екенін растайтын құжатқа қол қояды. Бұл – әлемдік тәжірибеде бар қалыпты талап. Жыл бойы біз тегін жаттығулар мен қауіпсіз жүгіру жайында дәрістер өткіземіз. Жарыс күні әрбір су бекетінде алғашқы көмек көрсетуге қажетті құрал-жабдықтар мен медицина қызметкерлері болады. Барлық бағыттар алдын ала мұқият әзірленіп, полиция мен медицина қызметтерімен келісілген», – деді ол.

Қор марқұмдардың отбасыларына көңіл айтып, материалдық көмек көрсететінін хабарлады.