Дональд Трамп әкімшілігі заңсыз мигранттарға арналған ерікті кету бағдарламасын іске қосқанын мәлімдеді, - деп хабарлайды Jambylinfo.kz 

Мигранттар арнайы жасалған CBP Home мобильді қосымшасы арқылы өтініш бере алады. Елден кеткені расталған соң, мемлекет оларға 1000 доллар төлейді (бұл шамамен 500 мың теңге).

"Ерікті түрде кету — АҚШ-тан шығудың лайықты жолы. Бұл шара мигранттардың иммиграциялық полициямен бетпе-бет кездеспеуіне мүмкіндік береді. Ал CBP Home қосымшасы арқылы бұл процесс 70 пайызға арзанға түседі", – делінген мәлімдемеде.

Қазір бір мигрантты ұстау, қамап, елден шығару үдерісі АҚШ салық төлеушілеріне шамамен 17 мың долларға (8,7 млн теңге) шығын әкеледі.

Министрлік бұл бағдарламаға қатысқан адамдардың болашақта заңды түрде АҚШ-қа қайта оралу мүмкіндігі сақталатынын атап өтті.

Президент Трамп бұл бағдарламаны сәуір айының ортасында жариялаған болатын.