Бұған оның әскери төтенше жағдай енгізуге әрекеттенуі себеп болған, деп хабарлайды Jambylinfo.kz BBC-ге сілтеме жасап.

Президенттікке бес кандидат түскен. Алайда басты бәсеке екі саясаткер арасында өрбіді: Демократиялық партияның өкілі Ли Чжэ Мён мен экс-президент Юн Сок Ёльдің «Азаматтық күш» партиясынан ұсынылған Ким Мун Су.

Жергілікті KBS, MBC және SBS телеарналарының бірлескен экзитполы бойынша, Ли Чжэ Мён 51,7% дауыс жинап, қарсыласынан озып тұр. Ким Мун Су – 39,3%, ал үшінші орындағы "Жаңа реформалар" партиясының үміткері Ли Чун Сок – 7,7% жинауы мүмкін деген болжам бар.

JTBC арнасының жүргізген сауалнамасы да ұқсас нәтиже көрсеткен: Ли – 50,6%, Ким – 39,4%.

Сайлауалды сауалнамаларда да Ли Чжэ Мён негізгі фаворит саналды – ол Кимнен 10–14 пайызға алда болған. Айта кетейік, Ли 2022 жылғы президент сайлауында Юн Сок Ёльден аз ғана айырмашылықпен жеңілген еді. Ал Ким Мун Су – сол кездегі үкімет құрамында министр қызметін атқарған.