Қытайдың әскери сарапшылары мен мемлекеттік талдаушылары Starlink жүйесін бейтараптандырудың түрлі нұсқаларын зерттеуде. Оған себеп — Илон Масктың спутниктік желісі АҚШ-тың әскери мақсаттарына пайдаланылуы мүмкін деген қауіп, деп хабарлайды Jambylinfo.kz 

Қытай зерттеулерінде қарсы іс-қимылдың бірнеше әдісі айтылған: сигналдарды ұстап алу және бұғаттау, спутниктерге химиялық заттармен әсер ету немесе арнайы құрылғылар арқылы оларды істен шығару. Сонымен қатар, иондық қозғалтқыштары мен лазерлік қаруы бар «соққыға арналған спутниктер» туралы да жорамалдар бар — олар орбитадағы нысандарды тікелей жоюға қауқарлы болуы мүмкін.

SpaceX компаниясына тиесілі Starlink бүгінде орбитадағы шамамен 12 мың белсенді спутниктің 8 мыңына ие. Компания 140 елде интернет қызметін ұсынуда, алайда Қытай, Иран және Солтүстік Корея бұл тізімде жоқ.

Осыған байланысты Қытай өзінің Guowang және Qianfan атты спутниктік желілерін дамытып жатыр. Алайда әзірге жоспарланған 15 мыңнан тек 100-ге жуық спутник қана ұшырылған. Starlink-тің негізгі бәсекелестері де артта қалуда: Amazon-ның Kuiper жобасында 78 спутник, ал OneWeb жүйесінде шамамен 650 спутник бар.