Биыл мамыр айының екінші жартысында Қазақстанның оңтүстігіндегі ірі мегаполис 125 қала ішінен 42-орынға тұрақтаған, деп хабарлайды Jambylinfo.kz 

Алматыдағы ауа сапасының индексі — 61, бұл орташа ластану деңгейін білдіреді. «Қазгидромет» мамандары Алматыны атмосфералық ауасы жоғары және өте жоғары дәрежеде ластанған қалалар қатарына жатқызады.

Ауаның ластануына басты себеп — автокөлік. Ұлттық статистика бюросының мәліметінше, соңғы жылдары Алматы мен Алматы облысындағы көлік саны 28,8%-ға артқан. Биыл мамыр айының басында қала мен оның маңындағы аймақтарда тіркелген көліктер саны 1,4 миллионға жақындаған. Бұл көрсеткішке қалаға күн сайын қатынап жүретін көліктер де кіреді, өйткені маятниктік көші-қон (күнде келіп-кететіндер) ауқымды. Сол себепті трафикке қала маңындағы көліктер де әсер етеді. Осы көліктердің басым бөлігі — ескі. Мәселен, 609,7 мың көлік 20 жылдан астам уақыттан бері пайдаланылып келеді, ал 313,9 мың көліктің жасы — 10 жылдан 20 жылға дейін.

Алматыдағы көлікке байланысты экологиялық мәселені шешу оңай емес. Бұл үшін нақты стратегиялар мен ірі инвестициялар қажет. Ал ең алдымен маятниктік көші-қон мәселесін шешу керек. Алматы маңынан жаңа Алатау мегаполисі бой көтерсе, ол оңтүстік астананың демографиялық және көлікке түсетін салмағын азайта алады. Жаңа қала Smart City қағидаттарына сай жоспарланып жатыр — онда кең даңғылдар, магистральдер, экологияны бақылаудың «ақылды» жүйелері алдын ала ескерілмек. Алатау қаласы Алматы үшін экологиялық буферге айналып, көлік ағынын қайта бағыттауға мүмкіндік береді.