Қазақстандағы медициналық колледждерге қабылдану үшін енді талапкерлер емтихан тапсыруы тиіс, деп хабарлайды Jambylinfo.kz 

Мамандандырылуына байланысты бір пәннен емтихан тапсыру — барлық талапкерлер үшін міндетті. Бұл талап 9 және 11 сынып негізінде оқуға түсетіндердің барлығына бірдей қолданылады. Тек стоматология және ортопедия мамандықтарына бұл талап жүрмейді.

"Емтихан бейіндік пәндер бойынша базалық білімді, сондай-ақ талапкердің мотивациялық деңгейін бағалауды қамтиды", – делінген министрлік хабарламасында.

Ведомство бұл жаңашылдық Президент жариялаған «Жұмысшы мамандықтар жылы» аясында жүзеге асып жатқанын атап өтті.

«Мемлекет басшысы жариялаған жұмысшы мамандықтар жылы шеңберінде біз орта медициналық білім алатын мамандарды даярлау сапасына қойылатын талаптарды арттырамыз. Мотивация мен дайындықты бағалаудың бірыңғай тәсілі есебінен түсу кезінде әділеттілік қамтамасыз етіледі. Бұл қоғамның медициналық кадрларды даярлау жүйесіне деген сенімін арттырудың алғашқы қадамы», – дейді министрлік өкілдері.

Емтихан уақыты, тапсырмалар үлгілері мен өткізу тәртібі туралы ақпаратты колледждердің ресми сайттары мен ақпараттық жүйелерінен көруге болады.