Қостанай облысының әкімі Құмар Ақсақалов ОКҚ алаңында өңірдің 2025 жылдың 11 айындағы әлеуметтік-экономикалық даму қорытындылары жайлы баяндады, деп хабарлайды Jambylinfo.kz 

Оның айтуынша, экономиканың барлық салаларында оң серпін бар. Жыл басынан бері 24,1 мың жұмыс орны ашылды. Атаулы әлеуметтік көмек алатын отбасылар санының 23% төмендеуіне қол жеткізілді. Қостанай облысы машина жасау өндірісінің көлемі бойынша республикада көш бастап тұр. Ол Республика өндірісінің 25%-тен астамын құрайды. Бүгінде облыс кәсіпорындары өндіріске инновацияларды, цифрлық технологияларды белсенді түрде енгізуде және өнеркәсіптік роботтарды пайдалануда. 

«Қостанай облысы – республикамыздың машина жасау орталығы. Машина жасауда көшбасшылық позицияны ұстап тұруға ағымдағы жылы ашылған жаңа KIA зауыты мүмкіндік береді. Бұл Қазақстанның тәуелсіздік жылдарындағы ең ірі, стратегиялық жобалардың бірі. Ол рекордтық қысқа мерзімде, 1,5 жылда салынды. Оған қоса, кәсіпорында 1 500 адам жұмыс істейтін болады», - деді спикер баспасөз конференциясы барысында.