«Шымбұлақ» тау-шаңғы кешені биыл жөндеу жұмыстарын жүргізу үшін аспалы жолдарды уақытша жабады. Бұл туралы Алматы қаласы әкімдігінің баспасөз қызметі хабарлады, деп жазады jambylinfo.kz.

«13 мамыр мен 2 маусым аралығында «Медеу-Шымбұлақ» аспалы жолы жабық болады. Ал 13 мамыр мен 31 мамыр аралығында «Комби-1» және «Комби-2» аспалы жолдары да жабылады. Бұл ретте ККД-4 аспалы жолы әдеттегідей жұмыс істейді», – деп жазылған әкімдік хабарламасында.

Сондай-ақ  хабарламада 2024 жылдың 19 мамыры мен 24 мамыры аралығында Медеу-Шымбұлақ жартылай жолының жүк-тартқыш арқаны қысқартылатыны, құрылыс жұмыстарына байланысты қозғалысқа шектеу қойылуы мүмкін екені жазылған. 

Еске салайық,  Шымбұлақ тау курорты 2023 жылы Гиннестің рекордтар кітабына енген.