2025 жылғы су тасқыны кезеңіне дайындық аясында Қостанай облысы бойынша «Қазсушар» филиалы Жоғары Тобыл және Қаратомар су қоймаларынан су жіберу көлемін ұлғайтты. Бұл тасқын суын қабылдауға бос орын дайындау үшін жасалады, деп хабарлайды Jambylinfo.kz

Бүгінде Жоғары Тобыл су қоймасынан секундына 20 текше метр, Қаратомар су қоймасынан секундына 30 текше метр су ағызылады.

«Қостанай облысы бойынша «Қазсушар» филиалы Тобыл өзеніндегі су қоймаларынан 2024-2025 жылдарға арналған су ағызу кестесін әзірледі. Бүгінгі таңда қоймалардағы су көлемі аздап азайды, өйткені биыл жаз салыстырмалы түрде салқын әрі жауын-шашын көп болды. Сондықтан келесі жылы тасқын суын қауіпсіз қабылдап, оны өткізуді қамтамасыз ету үшін су жіберу көлемін ұлғайту туралы шешім қабылданды», – деді жергілікті «Қазсушар» филиалының директоры Дәурен Әбдіхамитов.