Теміртау қаласына жақын жерде екі көлік соқтығысып, екі бала қаза тапты. Тағы 10 адам ауруханаға түскен, деп хабарлайды jambylinfo.kz Қарағанды облысы полиция департаментіне сілтеме жасай отырып.

Жол апаты 7 мамыр күні сағат 17:56-да Алматы-Екатеринбург тас жолында, Теміртау қаласына жақын жерде болған. Toyota Camry және Chevrolet Nexia маркалы екі көлік соқтығысып, екі бала тіл тартпай қаза тапқан.

«Апат салдарынан Chevrolet Nexia көлігінің екі жолаушысы оқиға орнында қаза тапты, екі көліктегі он жолаушы медициналық мекемеге жеткізілді. Қаза тапқандардың екеуі де кәмелеттік жасқа толмаған», - деп хабарлады Қарағанды ​​облысы Полиция департаментінің баспасөз қызметі.

Аталған факті бойынша қылмыстық іс қозғалды. Сараптама тағайындалды. Қазір тергеу амалдары жүргізіліп, оқиғаның мән-жайы анықталып жатыр.