Мәжіліс депутаты Бақытжан Базарбектің айтуынша, Қазақстанда жарты миллионға жуық заңгер бар, бірақ олардың көбісі мамандығы бойынша жұмыс істемейді, - деп хабарлайды Jambylinfo.kz 

"Біз осы кадрлық әлеуетті тиімді пайдалана алмай отырмыз. Мен министрден сұрадым: Тәуелсіздік алған уақыттан бері жарты миллионға жуық заңгер дайындалыпты. Қашықтан және сырттай оқығандарды есепке алғанда – миллионға жуық адам. Бұл тек заңгерлер. Енді біз тағы да грант бөлмекпіз. Бұл әділ ме? Қазір заңгерді сот залынан ғана емес, базардан да, көшеден де кездестіруге болады – олар жұмыс іздеп жүр", – деді Базарбек заңгерлік білім беруді дамытуға арналған парламенттік тыңдауда.

Депутат сондай-ақ ең үздік прокурорлар, тергеушілер, жедел уәкілдер, медиаторлар, судьялар мен сот орындаушылар арасында білім сайыстарын өткізуге шақырды.

"Өкінішке қарай, бұл мамандықтардың қадірі кетті. Біреулер әділетсіз сот шешіміне тап болады, біреулерге заңсыз қылмыстық іс қозғалады. Осы жағдайлар қоғамның бұл мамандықтарға деген сенімін төмендетті. Қазір халықтың санасында құқық қорғау және сот саласы қызметкерлері жемқорлықпен байланыстырылып отыр", – деді ол.