Ұлттық дыбыс жазу өнері және ғылым академиясы «Грэмми» музыкалық жүлдесіне қатысты бірқатар ереженің өзгергенін мәлімдеді, деп хабарлайды Jambylinfo.kz

Енді «Үздік жаңа әртіс» номинациясына бұған дейін «Жыл альбомы» санатында ұсынылған орындаушылар да қатыса алады, бірақ олардың үлесі альбомның жалпы дыбыстық ұзақтығының 20%-ынан аспауы керек.

«Үздік кантри-альбом» номинациясы «Үздік заманауи кантри-альбом» деп өзгертілді, сонымен қатар жаңа санат — «Үздік дәстүрлі кантри-альбом» енгізілді.

Классикалық музыка номинацияларында композиторлар, мәтін авторлары және либретто авторлары енді орындаушылар, продюсерлер және дыбыс режиссерлерімен бірдей «Грэмми» сыйлығына ие бола алады.

«Үздік жазба қаптамасы» және «Қорапты немесе арнайы шектеулі басылымның үздік қаптамасы» санаттары біріктіріліп, «Үздік жазба қаптамасы» атауын алды. Сонымен қатар жаңа номинация — «Үздік альбом мұқабасы» қосылды.

«Грэмми» музыкалық сыйлығының 68-ші салтанатты марапаттау рәсімі 2026 жылғы 1 ақпанда, жексенбі күні Лос-Анджелестегі Crypto.com аренасында өтеді.