Бүгін, 31 наурызда, Қазақстан мен Словения президенттері екіжақты ынтымақтастықты кеңейту перспективаларын талқылап, нақты келісімдерге қол жеткізді және бірлескен мәлімдеме жасады, - деп хабарлайды Jambylinfo.kz 

Мемлекет басшысы Қасым-Жомарт Тоқаевтың айтуынша, тараптар сауда-экономикалық және инвестициялық байланыстарды нығайтуға уағдаласты.

– Тау-кен, жасыл энергетика, атом өнеркәсібі, цифрландыру және инновация, денсаулық сақтау, туризм салаларында тың жобаларды жүзеге асыруға келістік. Қолда бар мүмкіндікті тиімді пайдалану үшін Үкіметаралық комиссияның жұмысын жандандырып, оның қызметін жаңа деңгейге көтеруге шақырдым. Екі ел бизнес өкілдерінің байланысын тереңдету – маңызды міндеттің бірі. Осыған орай, «Қазақстан – Словения» іскерлік кеңесін құру мәселесін талқыладық. Елімізге Словенияның ірі кәсіпкерлері де келді. Ертең олардың қатысуымен бизнес-форум өтеді. Бұл іс-шара осы бағыттағы жұмысты күшейтуге ықпал етеді деп ойлаймын, – деді Қазақстан Президенті. 

Мемлекет басшылары көлік-логистика байланыстарын кеңейту мәселесін де талқылады. Атап айтқанда, словениялық "Лука Копер" теңіз портының Транскаспий халықаралық көлік дәлізіне қосылуы сөз болды және бұл бағытта өзара түсіністікке қол жеткізілді. Тиісті ведомстволарға екі ел арасындағы сауда көлемін арттыру бойынша нақты шаралар қабылдау тапсырылды.

Сонымен қатар, Қазақстан суды басқару ісіндегі Словенияның озық тәжірибесін зерделеп, осы салада бірлесіп жұмыс істеуге ниетті екенін білдірді.