Қазақстан мен Ұлыбританияның мемлекеттік органдары екі ел арасындағы еңбек көші-қонын реттеу және қазақстандық маусымдық жұмысшылардың құқықтарын қорғау мәселелерін қарастырды, - деп хабарлайды Jambylinfo.kz 

Вице-министр Асқарбек Ертаев Ұлыбританияның еңбек заңнамасының сақталуын бақылау және жұмысшыларды қанаудың алдын алу жөніндегі қызмет өкілдері Колин Нортон мен Невилл Брэдберимен кездесті.

Кездесуде қазақстандық азаматтардың Ұлыбританияға маусымдық жұмысқа шығу тәртібі, олардың еңбек құқықтарын қорғау және жеке жұмыспен қамту агенттіктерінің қызметін ұлттық заңнамаға сәйкес реттеу мәселелері талқыланды.

Биыл 11 ақпанда Лондонда өткен "Қазақстан – Ұлыбритания" стратегиялық диалогы аясында екі елдің тиісті мекемелері еңбек көші-қоны саласындағы ынтымақтастық туралы меморандумға қол қойды.

"Қазақстандық азаматтарға шетелде қолайлы еңбек жағдайларын жасау және оларды қабылдаушы елдің еңбек нарығына бейімдеу – екі ел арасындағы жауапты әрі өзара тиімді серіктестіктің маңызды бөлігі", – деді вице-министр.

Министрлік 2023-2027 жылдарға арналған көші-қон саясаты аясында жеке жұмыспен қамту агенттіктерінің қызметін реттеу тетіктерін жетілдіргенін мәлімдеді. Қазақстандықтардың шетелде жұмысқа орналасуын оңтайландыру үшін еңбек мобильділігі орталықтарымен өзара іс-қимыл алгоритмі бекітілді.