Таиландта өтіп жатқан халықаралық Futures Cup турнирінде қазақстандық боксшы Бибарыс Әшірбай чемпион атанды, деп хабарлайды Jambylinfo.kz 

Осылайша, Қазақстан құрамасының қоржынына турнирдегі төртінші алтын жүлде түсті.

Бибарыс Әшірбай – Жамбыл облысына қарасты Жуалы ауданында дүниеге келген.

Жарыс барысында Бибарыс бірнеше мықты қарсыласын ойсырата жеңді.

Атап айтқанда, 1/32 финалда тәжікстандық Мухаммад Мамадалиевті 5:0 есебімен ұтса, 1/16 финалда иорданиялық Анас Абсоулды екінші раундта техникалық нокаутпен жеңді. Ал 1/8 финалда оңтүстіккореялық Джунхю Юды бірінші раундта техникалық нокаутпен тізе бүктірді.

Сондай-ақ, ширек финалда америкалық Асанте Ламарды 3:2 есебімен тізе бүктірсе, жартылай финалда марокколық Марован Жафриді 5:0 есебімен айқын басымдықпен жеңді.

Ал финалдық бәсекеде Қырғыз елінің өкілі Ахмади Арвазды 3:2 есебімен жеңді.

Осылайша, қазақстандық боксшы турнирдің барлық кезеңінен сәтті өтіп, Futures Cup турнирінің чемпионы атанды.