2025 жылдың 16 қыркүйегінен бастап Қазақстан Республикасының Қылмыстық кодексіне дропперлік үшін жауапкершілік көзделген жаңа 232-1-бап енгізілді, деп хабарлайды Jambylinfo.kz 

Дропперлікке банк шотына, төлем немесе сәйкестендіру құралдарына заңсыз қол жеткізу, оларды беру немесе алу, заңсыз төлемдер мен ақша аударымдарын жасау, сондай-ақ материалдық сыйақы үшін банк картасын үшінші тұлғаларға беру жатады.

Бұл әрекет интернет-алаяқтықта ұрланған қаражатты қолма-қол ақшаға айналдыру мен шығарудың негізгі тәсілдерінің бірі болып табылады.

Жаңа бапқа сәйкес, қылмыстың ауырлығы мен келтірілген зиянға қарай жаза айыппұлдан бастап, мүлікті тәркілеумен бірге 7 жылға дейін бас бостандығынан айыруға дейін жетуі мүмкін.

Бұл өзгеріс кибералаяқтыққа қарсы жүйелі күрес жүргізуді, азаматтардың қаржылық қауіпсіздігін қорғауды және цифрлық ортадағы қылмыстық топтардың әрекетіне тосқауыл қоюды мақсат етеді.