Бүгін Т.Рысқұлов саябағында облыстық «AR-AI» жастар газетінің фотокорреспонденті Алтынбек Қартабайдың фотокөрмесі өтті, деп хабарлайды Jambylinfo.kz

Ш.Уалиханов атындағы әмбебап ғылыми кітапханасының ұйымдастыруымен өткен ерекше форматтағы фотогалереяда 80-ге жуық таңдаулы туындылар көрермен назарына ұсынылды.

Ашық аспан астындағы кездесуге ақпарат саласының ардагерлері, бірқатар зиялы қауым өкілдері және тұрақты кітапхана оқырмандары мен қала тұрғындары қатысты.

Сонымен қатар табиғат аясындағы керемет кештің куәсі болуға Алтынбек Болатұлының 80-нен асқан ақжаулықты анасы арнайы келіп, ұйымдастырушыларға алғысын айтып, ақжарма тілегін арнады.

 Айта кетейік, фототілшінің жекетұлғалық құнды құжаттары мен таңдаулы 500-ге жуық фотосуреті Тараз қалалық мемлекеттік архивте сақтаулы.