Жамбылдық полицейлер көпірден секірген әйелді құтқарып қалды, деп хабарлайды  Jambylinfo.kz

Тараз қалалық ПБ кезекші бөліміне жергілікті тұрғын көпірден секіру арқылы өз-өзіне қол жұмсамақ болғаны туралы хабарлама түскен.

• Оқиға орнына дереу жеткен полиция қызметкерлері әйелді ниетінен бас тартуға сендіру үшін бар күш-жігерін салды. Әйел секірмек болған сәтте полиция қызметкері оны киімінен ұстап қалмақшы болған. Алайда ол полицейдің қолынан шығып кетіп, суға құлап кеткен,- деді ПД баспасөз қызметі.

Осылайша жедел әрекетке көшкен полиция лейтенанты Әлиайдар Рысмұхамбетов қатты ағысты өзенге секіріп түседі.

• Төтенше жағдайлар қызметінің қызметкері және жақын маңдағы жергілікті тұрғынмен бірге әйел құтқарылып, жағаға шығарылды. Құлаған кезінде оның футболкасы жыртылып қалғандықтан, полиция қызметкері оған қамқорлық көрсетіп, өз киімін кигізген,-деді құзырлы орган.

Әйел өзінің шарасыз әрекетіне отбасылық жанжалдың себеп болғанын түсіндірген.

• Келген жедел жәрдем бригадасы әйелге қажетті медициналық көмек көрсетті. Қазіргі уақытта оқиғаның барлық мән-жайын анықтау жұмыстары жүргізілуде,- делінген хабарламада.