Таразда «Таза Қазақстан» акциясы аясында Сеңкібай арнасы тазаланды, деп хабарлайды Jambylinfo.kz.
Облыс орталығы Тараз қаласында «Күзгі тазалық» эко акциясы шеңберінде «Сеңкібай» каналының 5 шақырым арақашықтықты құрайтын жағалауы қоқыстардан тазартылып, экологиялық акцияға қатысушылар шашылып жатқан пластик қалдықтар мен қоқыстарды жинап, 200-ден астам қап қоқысты арнайы орынға апарып төкті.

-    Бүгін республикалық «Таза Қазақстан» акциясы аясында күзгі тазалық шарасы жүргізілуде. Бұған жастар ұйымдары, «Жасыл ел» еңбек жасақтары мен басқа да түрлі сала өкілдері атсалысып жатыр. Бұл жұмыстар тек Сеңкібай каналының жағасында ғана емес, айналасындағы үйлер мен стадионның аумағында да жүргізіліп жатыр. Республикалық акция көктемде бастау алған еді. Қазір тазалық шарасына тек қала аумағында ғана емес, шалғай ауылдарда да тұрғындар өз үлестерін қосып жатыр. Мысалы, осмы акцияға мен жанымдағы 15 еріктіні алып келіп, қатысып жатырмыз. Мұндай жұмыстарға аудан жастары да қатысып жатыр. Айтып айтпай не керек, біз жастар қауымдастығын ұйыстыра отырып осындай тазалық акцияларын жиі ұйымдастырамыз. Көрнекілік есебінде әлеуметтік желіге салатын емес, шын пейілімізбен кірісіп, қала тұрғындарына көмектесіп, қоршаған ортаға құрметпен қарау бойынша тазалық шараларын ұйымдастырып тұрамыз. Тазалық үшін тер төгіп жатқан жандарға алғысымызды білдіреміз,- деді Қазақстан студенттері альянсының Жамбыл облысы бойынша филиал төрағасы Дархан Байпақ

Ал, ерікті Нұрай Сатылғанованың сөзінше, каналдарды тазалау жұмыстары қашанда айрықша маңызға ие. «Бұл жұмыстар өңірдің шырайын ашып қана қоймай, су тасқыны қатерінің алдын алуға да септігін тигізеді дейді» ол. 

-     Мелекет басшысының тапсырмасы аясында өткізіліп жатқан «Таза Қазақстан» акциясы аясында Сеңкібай арнасының маңын тазалап жатырмыз. Ерікті ретінде түрлі қайырымдылық іс-шараларына жиі қатысамын. Бүгінгі экологиялық шараға да өз ықтиярыммен келдім. Байқағаным, қаламызда қазір дәл осындай игі іске жұмыла кететін жастар қатары көбейіп келеді. Бүгінгі тазалық акциясында да жастардың үлесі аз емес екені көрініп тұр. Біз ай сайын бірнеше рет осындай тазалық жұмыстарына қатысамыз. Мысалы, осы қаладағы қариялардың ауласын тазалап беру, үйін ретке келтіру, қаржылық жағынан көмектесу бойынша жастар болып жұмыла кетеміз. Осы секілді қала тазалығына да ерекше қамқорлық танытып, экологиялық акцияларға қатысамыз. Жалпы, тұрғындарды қоршаған ортаға мейіріммен қарауға, осындай игілікті іске атсалысуға шақырамын,- дейді ол. 

773 мыңнан астам облыс тұрғындары қатысқан көктемде басталған экологиялық акция жыл сайын дәстүрлі түрде қолға алынатын күзгі тазалық айлығына ұласты.

-     Мәдениеттілігімізді көрсететін тазалықтың адамзат баласы үшін орны ерекше. «Сенбілік – қаланың сәулеті мен сәнін арттыратын, тазалығы мен тәртібін түзейтін ерекше үрдіс. Туған жерімізді, оның ішінде қоғамдық жерлерде тазалық сақтау арқылы көпшіліктің ризашылығын алатынымызды естен шығармаған жөн. Ол үшін әрбіріміз осы тазалықтың төңірегінде жауапты екенімізді сезіну ғана жеткілікті. Сананың тазалығы арқылы айналаның тазалығына үлес қоса алатынымыз анық, - деді сенбілікке қатысушы Аят Асқарбекұлы.

Күзгі тазалық айлығының басталуына байланысты тазалық жұмыстары облыстың барлық аудандарында өткізілді. Атап айтқанда, су айдындарының жағалауларында, саябақтар мен скверлерде, көпқабатты тұрғын үйлердің маңында, демалушылар көп жиналатын орындарда жалғасты.
Белсенді азаматтар, еріктілер мен жастар Байзақ ауданының Сарыкемер ауылындағы А.Суханбаев атындағы орталық саябақта, тарихи-өлкетану мұражайында, Қордай ауданының Касық және Жамбыл ауылдық округінің автомобиль жолының бойында тазалау жұмыстарын жүргізсе, Жуалы ауданының рухани орталығы болып саналатын Талапты ауылындағы Шерхан Мұртаза музейінде 100-ден астам адамның қатысуымен «Өнегелі ұрпақ» экологиялық акциясы ұйымдастырылды.
Сондай-ақ, Меркі ауданының Аспара, Ақермен, Т.Рысқұлов ауданының Құлан ауылдық округтерінде еңбек ардагерлері, тыл, жалғызбасты қарттардың аулаларында суару, арықтарын тазалау, әктеу, қоршауларды сырлау жұмыстарын жасап, көмек қолдарын созды.
Акция Жаңатас қаласында адамдар көп жүретін темір жол вокзалында, «Ақұбұлақ» демалыс аймағы мен көпқабатты тұрғын үйлердің маңында жүргізілді.
Бүгінгі күнге акция аясында 60 тарихи-мәдени ескерткіш, 143 саябақ пен сквер аумағы, 818 шақырым каналдар мен арық жүйесі, 129 мың аулалар мен 4,5 мың шақырым көше жолдары тазартылды. 16 мың тонна қоқыс шығарылды. 60 мыңға жуық көшеттер отырғызылды.
Бұл жұмыстарға жалпы 958 бірлік техника қатысты.